“Talo La’aan Ayuu Maanta Dalku Ku Sugan Yahay, Waxa La Is Waydiinayaa Ciddii Taladda Dalka Loo Dhiibtay Meeday” Afhayeenka Isbahaysiga KULMIYE.

0
98

Afhayeenka Isbahaysiga Xuseen Axmed Caydiid, ayaa si adag uga hadlay aragtidiisa ku waajahan muddo kordhinta Xukuumadda ee la hadal hayo, qabsoomida Doorashooyinka iyo saami qaybsiga, waxaanu tilmaamay in Xukuumaddu waajibkeedii iyo doorkii ay ku lahayd saami qaybsiga ay gabtay.

Afhayeenka Isbahaysiga Xuseen Axmed Caydiid oo wareysi gaar ah siiyey Wargeyska Geeska Afrika ayaa sidoo kale ka hadlay halka uu marayo wada hadalada ay la lahaayeen Xisbiga Mucaaradka ee Waddani, waxaanu sheegay in wada hadaladaasi gunaanad ku dhow yihiin. “Wada hadaladu Ramadaanta horteedii meel wanaagsan bay noo gaadheen wali meel kama dambaysa may gaadhin, waxay runtii soo gaadheen meelo go’aano muhiim ah in laga qaato u baahan bay soo gaadheen, oo kolay halka ugu sareeya taladda dhinaca Xisbiga Waddani laga go’aamayo oo go’aan lagaga gaadho ayey soo gaadhay, arinta oo halkaas soo gaadhay iyo Guddoomiyaha oo ay la soo darseen socdaalo fara badan kii uu ku tagay Mareykanka, kii uu haddana Barriga Afrika ugu baxaya kii dambe uu haddana Yurub ugu baxay iyo imika oo Diiwaangelintii uu ku maqan yahay waxaad mooda in Guddoomiyaha socdaaladiisi yara bateen, waxaana filayaa kolay haleel darada mooye sida qolada Waddani in badan warbaahinta u sheegnay qolada Waddani-na wey danaynayaan in wada hadalaasi meel wanaagsan ku gabagaboobaan, anaguna Isbahaysi ahaan kol haddii aanan siyaasadii ka baxayn oo aanu is leenahay wali Siyaasadii waad u sii da’ yartihiin waanu danaynaynaa in taladda umadda meeluun ka raacno anagu, markaas haleelka ayuun baa kala kaxeeyey iyo Bishii Ramadaan oo iyana runtii murankeeda dib iskaga dhiganay, wax na dadajinaya oo Doorasho ah oo fooda inaga soo haysa oo hadda taagan oo aan leeyahay lagama gaadhsiin karo ma jirto,wali wakhti baa la iska haystaa, wada hadalkuna wuxuu u socdaa si togan, oo wanaagsan, waxaana is leeyahay go’aankii ugu dambeeyey iyo qurxintii ugu dambeeysay in lagu sameeyo ayuun baa dhiman”.

Mar aanu wax ka weydiinay sida uu arko muddo kordhinta Xukuumadda ee la hadal hayo, Doorashooyinka iyo arinta Saami qaybsiga ayaa ku jawaabay “Dalkan haddii muddo kordhinuun lagu wado oo umaddu wixii ay ku heshiisay iyo qawaaniintu wixii  ay ahayd la gees maro anigu waxaan qabaa waa xil gudasho la’aan ayaa meeshii muuqanaysa, waxa maanta la hadal hayo weynu arkaynaa oo xeerkii Golaha Wakiilada lagu soo dooran lahaa iyo labadii Doorasho oo isa saaran, markii labadaas Doorasho kala qaadnayeen waa la qaban waayey, waa la isla doontay oo tii Madaxtooyada inta dib loo riday baa la yidhi ha loo geeyo ta Golaha Wakiilada, waana la og yahay tii Golaha Wakiilada in aanu xeerkeedii diyaar ahayn marka ma maalinta ay muddadu dhamaato ayaa la ogaada in xeerku qabyo yahay,markii hore ee la isku geeynayey waa la arkaayey inuu xeerku in aanu dhamayn.

Taladda dalka markii lala wareegayey waxa la arkaayey xeerku inuu qabyo yahay, umaddu inay qorsho yeelato oo waxa qabyada ah inay qabyo tirto soo maaha, ma maalinta la yidhaahdo doorasho aynu u dhaqaaqno ayey tahay in la yidhaahdo wixii ma jiraan, waanu ka war haynaa Golaha Guurtida ee fadhiya dhawr iyo  laabatanka sanno mar kasta oo ay korodhsiimo sameeyaan dalka oo dhan qaylo ayaa ka yeedhi jirtay, xeerkiisi ma yaala,xeerku ma samada ayuu ka soo dhacaya,maalin dhawayd waxaan arkaayey iyadoo xisbiga Waddani lagu eedaynayo xeerkaas samayntiisi, oo la leeyahay kow iyo toban sanno ayuu Golahaasi fadhiyey ee xeerkaas muxuu wax uga qaban waayey, xeerkaas ninkii akhriyaa uu arkayaa ciladu halkay saaran tahay xeerkaasi halka uu ku dabran yahay afti iyo tirikoob dadka laga qaado tirikoob ma Golaha Wakiilada lahaa mise Xukuumadda, soo may ahayn inay iyadu la timaado,  haddii ay aragtay inay la iman kari weydo soo may ahayn inay xal kale keento, oo xeerka wax ka badasho oo ka saarto carqalada meesha ku jirta soo may ahayn, halkaas xil gudasho la’aan baa ka dhacday”.

Mar uu ka hadlayey hogaaminta dalka ayaa waxa uu  yidhi “Anigu waxaan u arkaa in talo la’aan dalku sii noqon Karin, talo la’aan buu maanta dalku ku sugan yahay, waxa la is weydiinaya ciddii taladda loo dhiibtay meeday,marka haddii la yidhaahdo ha la kordhiyo yaa loo kordhinayaa, kumaa loo kordhiyaa aniga waxay ila tahay arinkaasi talo ayuu u baahan yahay dhawrkaas bilood ee hadhsan xeerkaas in loo badheedho oo si uun Xukuumadda iyadoo soo qaybo tirtay ay Golaha Wakiilada u soo gudbiso, oo Golaha Wakiiladuna uu waajibkiisa ka gutaan, qabyadaas taagan waxay u taala Xukuumaddii tirikoobka qaban lahayd, tirikoobka soo baxana loogu saleeyo sharciga, marka ay qaban weydo,maxa lagu saleeynayaa kalena aanay meesha oolin maxa la yeelaya, ha keento Xukuumaddu wixii kale ee ay ug wareegayso”

Comments

comments