Tartanka guud ee Xifdiga Qur’aanka kariimka ah ee Somaliland oo laba maalmood ka socday masjidka Cali Mataan ee badhtamaha Magaalada Hargaysa ayaa shalay la soo gebagabeeyay.
Tartankaasi oo ka qayb qaadanayeen arday ka kala socotay gobolada iyo degmooyinka dalka ayay ardaydu waxay ku kala tartamayeen 30-ka Jis iyo 15-ka Ji see qur’aanka kariimka ah.Waxaana munaasibadii xidhitaanka ka soo qayb galay masuuliyiin ay ka mid ahaayeen wasiirka diinta iyo awqaafta, wasiirka dib u dejinta, wasiiru dawlaha waxbarshada iyo tacliinta sare ee Somaliland iyo inta badan culimada waaweyn ee dalka.Imaamka masjidka Cali Mataan Sheekh Maxamed Adaan, kana mid ah guddida qaban-qaabada tartanka Qur’aanka ayaa sharaxaad ka bixiyay qaabkii uu u qabsoomay tartanka Qur’aanka kariimka ah.Waxaana tartankaasi kaalinta koowaad ku guulaystay C/xamiid Mustafe Adaan, oo ka socday gobolka Togdheer, halka kaalinta labaad iyo sadexaad ay galeen Caydruus Cabdilaahi iyo Maxamed Mustafe Cigge, oo ka socday gobolka Maroodijeex.
Wasiirka wasaaradda Diinta iyo awqaafta Somaliland Sheek Khaliil Cabdilaahi Axmed, oo munaasibadda soo xidhay ayaa u mahad naqay cid kasta oo ka qayb qaadatay qabsoomidda tartankaasi Qur’aanka kariimka ah gaar ahaan shirkadda Dahabshiil oo maal gelisay.
Wasiirka wasaaradda dib u dejinta Cali Siciid Raygal, oo hadal kooban ka jeediyay xafladii xidhitaanka tartanka Qur’aanka kariimka ah ayaa hambalyeeyay tartameyaashii da’da yaraa iyo waliidiinta dedaalka weyn ku bixyay ubadkooda.Waxaa kale oo munaasibadda ka hadlay madaxa Idaacadda Qur’aanka kariimka ah Maxamed Cabdilaahi Shabeel iyo xubno ka mid ah culimada waaweyn ee dalka. Waxaana ka mid ahaa culimadii madashaasi ka soo qayb galay Sheekh Maxamed Cumar Dirir, Sheekh ismaciil-dheeg iyo culimo kale.
Waxaana tartameyaashii kaalmaha hore galay la guddoonsiiyey abaalmarino kala duwan oo ay ka mid ahayd lacag caddaan ah. Iyadoo tartamihii kaalinta koowaad galay C/xamiid Mustafe Adaan lagu abaalmariyey lacag $4000 Doolar ah iyo fursad lagu gaynayo xajka sanadkan.
