Ujeeddada Safarka Madaxweyne Siilaanyo, Dareenka Lagu Soo Dhaweeyey & Hoyashadiisa Burco

0
1339

Xog-warran Uu Afhayeenka Madaxtooyadu Ka Bixiyey   Weftigii Madaxweynaha Oo Xalay Ku dhaxay Burco Iyo Sii Ambo-qaadka Saaka

Madaxweynaha Somaliland Axmed Maxamed Maxamuud (Siilaanyo) iyo Wefti uu hoggaaminayo oo gelinkii hore ee Sabtidii shalay ka baxay Caasimadda Hargeysa, ayaa gaadhay magaalada Burco ee xarunta gobolka Togdheer, halkaasoo si diirran loogu soo dhaweeyey.

Ujeeddada Safarka Madaxweynaha iyo Weftiga uu hoggaaminayo, ayaa la xidhiidha u kuur-gelidda iyo qiimaynta xaaladda Abaaraha ka taagan gobollada Bariga, gaar ahaan waxa uu Safarkiisu ku jahaysan yahay gobollada Saaxil, Sool, Sanaag iyo Togdheer oo uu magaalo-madaxdeedii caawa ku hoyday.

Haddaba, Warbixin Safarka Weftiga Madaxweynaha, Ujeedkiisa iyo meelaha uu marayo iyo weliba cidda ku wehelisa uu ka soo diyaariyey Xafiiska Afhayeenka Madaxtooyada Somaliland oo Nuqul ka mid ahi soo gaadhay wargeyska HUBAAL,   waxa uu u dhignaa sidatan:- “Madaxweynaha Jamhuuriyadda Somaliland, Mudane, Axmed Maxamed Siilaanyo oo ay wehelinayaan Gudoomiyaha Xisbi Xaakimka Kulmiye, Murashax Muuse Biixi Cabdi, Marwada Koowaad ee Qaranka Somaliland Marwo, Aamina-weris Sheekh Maxamed Jirde, Xubno ka mida golaha Wasiirada, Taliyaha Ciidanka Booliska, Sareeyo guuto Cabdilaahi Fadal iimaan, Masuuliyiin ka tirsan xisbiga Kulmiye oo uu ka mid yahay Wasiirkii hore ee Maaliyada, Mudane Cabdicasiis Maxamed Samaale iyo Masuuliyiin kala duwan oo muhiima ayaa safarkan ay ugu baxeen maanta gobolada bariga Somaliland waxa uu salka ku hayaa qaylo dhaanta abaareed ee ka soo yeedhaysa shacbiga goboladaasi ku dhaqan oo abaar balaadhani ku habsatay dad iyo duunyo wixii ku noolaa deegaamadaasi.

Safarkan oo ujeedadiisu ay tahay sidii uu madaxweynaha qaranka Somaliland ugu kuurgeli lahaa xaalada guud ee dadka iyo duunyada, iyo sidii wax loo gaadhsiin lahaa dadka iyo xoolaha tabaalaysan ee la tiicaya haraadka, gaajada, dhaxanta iyo hayaanka qofba meel ku qabsatay ee ay la daala-dhacayaan reer guuraaga ku dhaqan gobolada Saaxil, Togdheer, Sanaag, iyo Sool oo iyagu ah dadka madaxweynuhu u gurmaday ee u fadhiga uga kacay sidii loo badbaadin lahaa dad iyo duunyo Ilaahay ayaa wax badbaadiyee.

Madaxweynuhu markii uu gaadhay gobolka saaxil waxa uu kulan degdeg ah la qaatay guddida heer qaran iyo heer gobol ee abaaraha dalka oo si wada jira madaxweynuhu uga dhegaystay xaalada guud ee abaaraha gobolkaasi inta ay baaxad ahaan leegtahay iyo sida wax loo gaadhsiin karo iyadoo guddiduna warbixin waafiya ka bixisay halka xaal marayo iyo sida wax looga geysan karo arrintaa.

Markii kulankaasi soo dhamaaday waxa saxaafada si wada jira ula hadlay afhayeenka madaxtooyada, Mudane Deyr oo sheegay in ujeedada kulankani ay la xidhiidho ujeedada safarka madaxweynaha ee xaalada abaarta waxaanu ku soo dhaweeyey sheekh Cabdiraxmaan Axmed, oo ku hadlayey afka gudida heer qaran ee abaaraha Somaliland, waxaanu sheekhu yidhi”ugu horayn waxaynu Ilaahay ka baryeynaa inuu abaarta inaga soo jebiyo, xaalad adag ayaa jirta oo sii adkaanaysa, cabashada iyo qayla-dhaantu maalinba maalinta ka damaysa aad ayey u sii adkaanaysaa, guddiduna intii hawshani soo korodhay waxay qabatay hawl aad u balaadhan waxaana aanu isla go’aansanay in aanu soddon kun oo qoys (30,000 Family) oo taakulo degdeg ah aanu gaadhsiino, goboladan ay masiibada abaartu ku habsatay gaar ahaan afarta gobol ee Saaxil, Togdheer, Sanaag iyo Sool,”.

Waxaanay weftiga Madaxweynuhu u boqooleen dhinaca gobolka Togdheer iyadoo si weyna loogu soo dhaweeyey degmooyinka iyo tuulooyinka u dhexeeya labadaa gobol oo madaxweynuhu uu u degayey dadweyne tiro badan oo isugu soo baxay goobahaasi kana muuqato qiiro waddanimo iyo inay la wadaagaan madaxweynahooda dareenka waddanimo ee uu ugu kuurge

layo xaalada shacbiga iyo duunyada abaartu barakicisay ee habqanka iyo kala daadashadu ku dhacday ee u baahan gacanta madaxdooda, ganacsatadooda, dadkooda, iyo cidii taakulo ka geysan karta xaaladooda wakhtigan ee uu ugu  sareeyo madaxweynaha qaranku.

Weftiga Madaxweynaha oo Caawa [Xalay] fiidnimadii ku hoyday caasimada labaad ee Somaliland ama magaalo madaxda gobolka Togdheer ee Burco ayaa markii uu gaadhay halkaasi waxa saxaafadda gobolka Togdheer la hadlay Afhayeenka Madaxtooyada, Mudane Xuseen Aadan Cige (Deyr) oo warbaahinta u sheegay in safarkani yahay mid madaxweynuhu uu go;aan ku gaadhay sidii uu indhaha uga soo qaadi lahaa baaxada ay leedahay abaartu, gurmadna uu u yahay dadka iyo duunyada ku dhaqan afarta gobol ee aadka looga dayriyey, waxaanad ogtihiin in madaxweynaha qaranku ku suntan yahay taariikhda dalka marwalba hormuudna uu u yahay damqashada iyo xaalada dadkiisu ay ku sugan yihiin, tagina ay tahay mid ka sii daran abaarihii dalka soo maray waayadan. Wa-bilaahi Tawfiiq.”