Danjire Xuseen Cali Ducaalle oo ahaa Wasiirkii Maaliyadda ee Xukuumaddii UDUB ee Madaxweyne Daahir Rayaale Kaahin,ayaa ka hadlay dhacdo kulmisay oo ay iskugu yimaadeen Guddoomiyaha xisbi KULMIYE Muuse Biixi Cabdi oo markaa xisbigiisu u tartamayay hanashada kursiga ugu sarreeya iyo Cawil oo ahaa Wasiirka Maaliyadda Xukuumaddii UDUB oo doonayay in aan KULMIYE soo agmarin oo aanu doorashada kaga adkaan isla markaana ay labada xisbi aad u kala fogaayeen arragti ahaan.
Danjire Cawil oo ah ergayga wada hadallada Somaliland iyo Soomaaliya u qaabilsan xukuumadda Axmed Siilaanyo, waxaa kale oo uu intaa ku daray in kulankii isaga iyo guddoomiye Muuse dhex maray ay ku daweeyeen dagaal siyaasadeedkii xilligaa ee ka dhex taagnaa labada xisbi.
Cawil Cali Ducaale oo ka qayb galay munaasibad Xisbiga KULMIYE ku soo dhawaynayay Prof Samatar oo shalay lagu qabtay magaalada Boorama,ayaa yidhi.
“Waxaan doonayaa in aan halkan ka sheego dhacdo na kulmisay Guddoomiye Muuse Biixi ay lagama maarmaan tahay in la ogaado, xilligii xukuumaddii UDUB ee aan ahaa Wasiirka Maaliyadda, Guddoomiye Muuse iyo Kulmiyena ay mucaaridka ahaayeen oo ay xaaladu meel xaasaasi ah maraysay oo xataa caalamka oo na soo dhex galay ay isu keeni kari waayeen labada xisbi oo aad u kala fogaa oo KULMIY-na kursiga hanashadiisa halgan ugu jiraan oo ay leeyihiin waa nala cabudhinayaa UDUB,ayaa noo hanjabtay iyo UDUB oo taagan siduu Xisbi mucaarid ahi dawladda ula murmaa. Xisbiga KULMIYE waxay anniga ii yaqaaneen sharwadaha koowaad Madaxweyne Daahir waa nin nabadeed ee waxan oo dhan waxa wada Cawil. Halka xisbigayagii UDUB-na uu aaminsanaa in dagaal oogaha KULMIYE uu Muuse Biixi yahay. Iyadoo xaaladdu meel xun marayso ayuu habeen Guddoomiye Muuse iigu yimi gurigayga,waxaanu igu yidhi “Xaalku meel xun ayuu marayaa nabadu in ay innaga bur-burtaana wax ina anfaca maaha oo nabad ayaynu ku dhaqnaanaynaa ee aynu labada oday isu keenu.” Danjire Cawil oo hadalkiisa sii wata ayaa intaa ku daray. “Markii aanu isla qaadanay ee aanu labada oday subaxnimadii isu keenayba xaaladii taagnayd way degtay oo wax dambe oo la isku qabtay may dhicin.taasina waa mid aan guddoomiye Muuse uu ogahay oo u qoran waa ninkaa ku dhiiraday iyadoo halkaa la kala taagan yahay in uu ku soo dhiirado in uu ii yimaado oo aanu arrintaa labadayadu ka hawl galno waana geesinimo iyo ku dhac uu leeyahay.”
Xuseen Cali Ducaale waxaa kale oo uu ka hadlay doorkii saraakiishii gobolka Awdal ay ku lahaayeen inqilaabkii ay 61 ku doonayeen in ay Somaliland dib ugu soo celiyaan iyo taariikh gaar ah oo ay isaga Booramau leedahay. Waxaanu ka mid noqday macalimiintii wax soo baray Guddoomiyaha Jaamacadda Camuud Prof Saleebaan Axmed Guuleed.
“Boorama aniga taariikh ii gaar ah ayay igu leedahay meelwayna way igaga taalaa waana magaaladii aan shaqadii iigu horraysay ka bilaabay oo waxaan macalin ka noqday Dugsigii Camuud oo ah imika Jaamacadda Camuud,Guddoomiye Saleebaan ayaan maalin waydiiyay tolow markii aan halkan macalinka ka ahaa ardaydii aan wax u dhigi jiray cidi ma ka joogtaa dalka, laakiin Prof Saleebaan wuxuu iigu jawaabay Wasiir anigaaba ka mid ahaa. Taasina waxay ii tahay farxad kale in ardaydaydii uu ka mid noqday Prof Saleebaan.waxaa kale oo Boorama ay Xusuus gaar ah iigu leedahay inqilaabkii aanu dhignay 61kii labdii sarkaal ee ugu qiimaha badnaa waxay ka soo jeedeen gobolka Awdal.”
Ugu dambayn waxaa uu ka hadlay ku soo biiridda Prof Samatar ee KULMIYE iyo mustaqbalkiisa siyaasadeed. Horta maanta farxad ayay ii tahay in aan goob joog ka ahaado Prof Samatar oo KULMIYE ku soo biiray waxaanay maanta(shalay) guul u tahay Somaliland oo dhan waa nin qaranku u baahan yahay wax bandanna inagu soo kordhin kara.muddo badan ayuu daawade ka ahaa siyaasada laakiin haddii uu is caddeeyay waan ku hambalyaynayaa aniguna daawadayaasha ayaan ka mid ahay laakiin dhawaan ayaan is caddayn doonaa xisbiyada ka aan ku biirayo walise daawade ayaan ahay.”